CEBU, Philippines - Ordinansa dali kaayong maabuso sa ubang mga tawo.
Pormal nang gibasura ni Cebu City Mayor Michael Rama kagahapon sa hapon ang Anti-Corporal Punishment Ordinance nga gipasar sa konseho sa miaging buwan.
“It is not just in the sense that parents are deprived of the right to discipline their children. It is unjust considering the fact that the constituents of the city are not ready for such a measure in the midst of poverty,” matud pa sa giluwatan nga duha ka pahinang veto message ni Rama.
Ang maong veto message lakip na sa wa pirmahe nga ordinansa nadawat sa konseho alas 3:20 kagahapon sa hapon.
Matud pa usab ni Rama dili patas nga ang giingong “offenders,” posibleng mga ginikanan ra usab ug abusahan ra unya usab kini sa ilang mga anak ug dili kalikayan unya nga dunay mga silingang masilo ug moakusar sa kontra nga ginikanan.
Ang makalapas sa Anti-Corporal Punishment posibleng mapriso ug mamultahan og P5 mil. Base sa maong ordinansa, gidili na ang pagpangasaba, pagpakauwaw, pagbunal o bisa’g unsa pang matang sa pagpasakit sa usa ka bata isip pagdisiplina.
“It is not reasonable when the ordinance attempts to promote positive punishment but instead appeared to be a penal ordinance declaring unlawful the acts of parents in the exercise of parental authority which even the national laws have recognized and respected. The issue of unemployment and poverty should be addressed first before penalizing parents for corporal punishment,” matud pa sa mayor.
Sa laing bahin, ang mayoriya sa konseho nga mibotar pabor sa ordinansa sama nila ni Konsehal Alvin Dizon ug Margot Osmeña daan nang namulong nga mahimo nilang i-override ang desisyon sa mayor. (BANAT NEWS)