Tungod sa sink hole development gipahunong

CEBU, Philippines - Gimando ni Barili Mayor Teresito “Ondo” Mariñas ang temporaryong pagpahunong sa pag-develop sa Mantayupan Falls nga maoy gituohang hinungdan sa nasinati nga sinkhole tungod sa mga bato ug yuta nga gipangkubkob sa palibot niini. Ang resort owner nga si Constantine Tanchan gimanduan sa mayor sa dili una padayunon ang development sa lugar hangtud nga masusi sa Mines and Geo-Sciences Bureau (MGB)-7 sa Department of Environment and Natural Resources (DENR)-7 ang hinungdan niini.

Si Mariñas dihang nahinabi sa Banat News mibutyag nga nagduda silang ang pagpangtangtang sa mga dagkong bato gamit sa mga bulldozers sa palibot sa maong lugar tungod sa gihimong development nga himuong eco-tourism ang maong dapit maoy nakaingon niini.

Apan ang laing gidudahan sa mayor nga posibleng epekto kini sa nabatyagan nila nga linog pipila ka adlaw sa wala pa motumaw ang sinkhole niadtong Martes.

Hinuon gimanduan sa mayor ang mga opisyal sa barangay Mantayupan sa pagpakoral sa palibot aron walay makapaduol sa lugar sama sa manglaba ug mangaligo paglikay sa peligro ug gipabantayan kini og tanod.

Gibutyag sa mayor nga nabalik na sa normal nga gilawmon sa tubig ang nahubas nga sapa sa Mantayupan apan nagsige lang gihapon og lilo ang palibot nga timailhan nga dunay lungag sa ilawom nga bahin niini.

Samtang gibutyag ni Alex Osua ang mining engineer sa MBG-7 dihang nahinabi sa Banat News ugma pa sa buntag masusi sa ilang geologist nga si Jun Lucero ang maong lugar tungod kay adunay laing dapit kining gisusi.

Ang maong sinkhole maoy ikatulong hitabo sulod lang sa usa ka tuig diha sa habagatang bahin sa Sugbu, unang may mibuthong sinkhole sa Barili ug dangtan ang pila ka adlaw sa Dumanjug na usab nga pulos silingang lungsod sa Badian.

Show comments