CEBU, Philippines - Patay ang usa ka 29-anyos nga lalaki human kini mapasok ilawom sa usa ka dump truck samtang nagsakay sa iyang bisekleta niadtong Miyerkules sa hapon diha sa Cebu South Coastal Road, habig sa sitio San Rafael, barangay Tanke, dakbayan sa Talisay.
Ang biktima mao si Ryan Alegado, residente sa maong barangay ang giingong nalangkat ang ubol-ubol niini tungod sa pagkapasok ilawom sa dump truck nga nagtangag sa plakang GHL-959 nga gimaneho ni Romulo Yares, 62-anyos, taga barangay Dumlog, Talisay.
Si PO1 Rosauro Pasumala sa traffic division sa pakighinabi niini sa Banat News kagahapon nagkanayon nga base sa imbestigasyon ni SPO4 Cleopas Bonjoc si Yares nagbiyahe kini gikan sa dakbayan sa Sugbo paingon na unta sa Dumlog.
Pag-abot diha sa lugar nga nahitaboan si Yares mi-brake kini apan tungod sa basa ug dangog nga karsada wala mohunong ang trak hinungdan nga giliwag niya kini ngadto sa tuong lane.
Apan niadtong higayona si Alegado nga luwan sa iyang bisekleta subay sa tuong gutter sa karsada naigo sa tuong bahin sa truck ug napasok sa ilawom hinungdan sa iyang kamatayon.
Si Yares ang nagtingkagol sa Talisay City detention cell ug gikatakdang mag-atubang og kasong reckless imprudence resulting to homicide. (BANAT NEWS)