CEBU, Philippines - Ang nadiskobrehang sink hole o huyonghuyong nga misuyop sa tubig nga nagbuhagay sa busay sa Mantayupan o Mantayupan falls sa barangay Mantayupan, lungsod sa Barili gikabalak-ang makapahubas sa sistema sa irigasyon sa maong lugar gawas kun kini masulbad dayon.
Ang nadiskobrehang sink hole o huyonghuyong nga misuyop sa tubig nga nagbuhagay sa busay sa Mantayupan o Mantayupan falls sa barangay Mantayupan, lungsod sa Barili gikabalak-ang makapahubas sa sistema sa irigasyon sa maong lugar gawas kun kini masulbad dayon.
Ang maong kabalaka gipadayag ni Mayor Teresito Mariñas sa maong lungsod kinsa mipahibawo dayon sa mga tinugyanan sa Mines and Geosciences Bureau (MGB) sa Department of Environment and Natural Resources (DENR)7 bahin sa maong huyong-huyong.
Kini human magkagubot ang katawhan sa maong barangay sa miaging adlaw dihang nasuta nila ang paghubas sa sapa sa Mantayupan.
Nasuta sa mga molupyo nga gisuyop ang tubig sa sapa sa maong huyonghuyong nga nahimutang sa gilay-ong usa ug tunga ka kilometro gikan sa Mantayupan falls.
Matud pa ni Mariñas nga human niya madawat ang maong taho mibisita dayon siya sa maong lugar ug gipakisayran ang caretaker o piyado sa luna diin nadiskobrehan ang huyonghuyong.
Didto nasuta sa mayor nga ang maong luna nga gipanag-iya sa pamilyang Tanchan may giugmad nga eco-tourism o kapasuroyan sa mga turista.
Nasayran ni Mariñas gikan sa piyado nga migamit og bulldozer ang developer sa paghinlo sa maong lugar ug pagpanguha sa mga bato ug mga sagbot sa palibot sa maong dapit nga kilid sa sapa. Apan nakurat na lang ang tanan dihang matud pa may mibuto sa maong dapit ug nahulpa ang yuta, nalungag kini sa gidak-ong labaw pa sa kalinginon sa usa ka baril, dayon gisuyop niini ang tubig sa sapa. Alang kang Mariñas, dako sila og pagtuo nga sa maong lugar may usa ka underground river o sapa ilawom sa yuta.
Gisukod sa mga molupyo sa ibabaw sa Mantayupan falls ang tubig sa sapa ibabaw sa nagbuhagay sa pangpang sa busay nga mikibra kini og mga duha ka metros ang gilawmon.
Gumikan niini si Mariñas mimando dayon sa kapitan sa Mantayupan nga ipakoral ang palibot sa huyonghuyong aron walay tawo o kaha hayop nga madisgrasya niini.
Gawas sa koral gimando usab ni Mariñas nga pabantayan og mga tanod ang palibot niini aron pagpahibawo sa katawhan nga delikado ang maong dapit.
Samtang gipaabot sa mayor sa Barili ang taga MGB kun unsay ilang ikatambag o kaha mahimong solusyon niini tungod kay nasiguro ni Mariñas nga apektahan ang kahumayan sa lungsod kun magpadayon ang paghubas sa sapa sa Mantayupan.
Sa pagsuwat ning balita wala pa makaluwat og pamahayag ang tinugyanan sa DENR. (/WC (BANAT NEWS)