CEBU, Philippines - Andam na ang mga mag-uuma sa lalawigan sa Sugbo sa pagpaabunda sa ani sa humay karong sunod tuig sibo usab sa gitakda sa kagamhanan sa pagpahunong sa importasyon og bugas sa maong higayon. Si Rowena G. Encabo, Irrigation Development Officer sa National Irrigation Administration (NIA) mihimo sa maong pasalig atol sa Association of Government Information Officers (AGIO) Forum kagahapon sa buntag didto sa buhatan sa Philippine Information Agency (PIA) nga gipalanog usab sa DYMR Radyo ng Bayan Cebu.
Matud pa ni Encabo nga sugod karong sunod tuig ang dul-an 500 ka ektarya nga kahumayan sa amihanang sidlakang bahin ning lalawigan nga naglangkob sa mga lungsod sa Asturias, Balamban, dakbayan sa Toledo ug uban pang lugar sa habagatang bahin sa lalawigan kalauman nga mo-ani na og katulo ka higayon matag tuig.
Kini gumikan sa kompletong mga suporta nga gitunol sa NIA ngadto sa mga mag-uuma ning lalawigan.
Pipila sa mga kapunongan sa mga mag-uuma nga gihimong sumbanan ni Encabo mao ang Bulahan Anislag Canlumampao Irrigators Association (BACIA) ug ang Asturias Balamban Communal Irrigators Association (ASBACOMIA).
Ang BACIA nga gipangulohan ni Eulalio P. Alipuyo nagtikad sa 125 ektaryas nga kahumayan, samtang ang ASBACOMIA nga gipangulohan ni Rustico P. Pontillas, nagtikad usab sa 330 ka ektaryas sa maong mga tanom.
Matud pa ni Alipuyo ug Pontillas nga sukad sila atimana sa NIA pinaagi sa gihatag kanilang maayong sistema sa irigasyon uban sa mga kahimaman sama sa traktora, tresher ug uban pang mga ekipo sa panguma, ang ani nila kaniadto nga tag 60 ka sakong humay matag ektarya matag ting-ani , sa pagkakaron nahimo nang 120 ka sako matag ektarya.
Samtang ang kaniadto moani lamang sila makaduha ka higayon matag tuig, sa pagkakaron makaani na sila og makatulo sa matag tuig. Sa pagkakaron ang gipaabot sa mga mag-uuma sa Toledo mao ang kaugalingon nilang rice mill aron dili na sila magtampunsisok sa pagpagaling sa ilang tupasi sa bugtong rice mill nga nahimutang lamang sa Balamban.
Matud pa ni Encabo nga gumikan sa abag sa Department of Agriculture, ang NIA nakahimo sa pagpauswag sa tanang mga mag-uuma og humay dili lamang sa taga Sugbo kundi sa tanang rehiyon sa tibuok nasud aron maandam ang tanan alang sa paghunong na sa rice importation sugod sa sunod tuig. - BANAT NEWS