CEBU, Philippines - Nahauli kagahapong adlawa sa ilang panimalay ang usa ka tinun-an sa 4th year high school human sa tulo ka adlaw nga wala na makauli sa ilang balay kay giingong gidagit sa tulo ka tawo niadtong Sabado sa buntag (Hulyo 7) dihang kini padulong unta sa ilang tunghaan sa barangay Apas ning dakbayan.
Ang 22-anyos nga tinun-ang lalaki molupyo sa barangay Apas ning dakbayan didto na makit-i sa barangay Jubay sa lungsod sa Liloan.
Una niini midangop ang pamilya sa tinun-an ngadto sa kapolisan tungod kay wala na kini makauli pa gikan mitungha sa Apas National High School.
Matud pa sa tinun-an nga usa ka kolor gray nga sakyanan ang mihunong sa iyang tungod ug may lalaking mition og armas kaniya ug pugsanon siyang gipasakay sa maong sakyanan.
“Naratol naman ko ato,nahadlok na sad ko misakay na lang ko sa sakyanan,” matud pa sa tinun-an ngadto sa mga tigbalita. Tungod sa kahadlok sa tinun-an misakay na lang siya sa sakyanan ug gidala siya sa usa ka mingaw ug kasagbutan nga lugar diin gimandoan sa pagkanaog ug gipaampo.
Sa dihang nakakita og higayon gisukmag niya ang usa sa mga lalaki ug mikaratil siya pagdagan, matud pa niya miagi siya og katunggan, kanipaan ug kalapokan hangtud nga naabot siya sa dagat ug didto siya mitago.
Dugang pa sa tinun-an nga niadtong Lunes sa gabii usa pa siya mihaw-as sa dagat ug didto siya napunta sa usa ka pribadong beach resort ug nagpatabang siya sa caretaker nga si Martiniano Altamera.
Aron pagkompirmar sa pamahayag sa maong tinun-an giadto sa mga tigbalita si Altamera kinsa mikompirmar nga gitabangan niya ang maong tinun-an kinsa iyang gihulagway nga nagkabulingit ug ‘shock.’
Ang gwardiya sa maong resort nga si Rodrigo Dayagdal, 45, mibutyag usab nga iyaha pang gikapkapan ang maong tinun-an aron pagsigurong wala kini magbinuang.
Kagahapon na sa kaadlawon nakuha sa mga ginikanan ang maong tinun-an sa Liloan.
Ang tinun-an midugang nga niadtong Hunyo 11 gisuwayan usab siya og dagit apan nasaypan ra siya ug gitagak diha sa dalan sa barangay Pardo ning dakbayan. Giingong dunay gipangita ang maong mga tawo nga giingong ‘nipatay’ sa ilang kauban. Apan giklaro niining dili siya sakop og bisan unsang grupo. Ang hepe sa kapolisan sa Investigation Detection Management Bureau (IDMB) Supt. Bonifacio Garciano mibutyag nga nagkatakdo lang ang pamahayag sa tinun-an ug sa mga ‘witness’ sa beach resort.
Apan ila pang palawman ang imbestigasyon bahin niini ilabi na ang background sa tinun-an tungod kay nagduda silang fraternity related ang maong kaso.
(/EIM)(BANAT NEWS)