CEBU, Philippines - Gumikan sa gihambin nga kaguol duha ka ulitawo ang naghikog sa miaging hapon sa nagkalainlaing lugar ning lalawigan sa Sugbo.
Ang mga naghikog giila nga sila si Rolland Abadiano, 42, ulitawo nga taga barangay Langtad, lungsod sa Argao ug si Elimar Roman, 17, ulitawo usab nga taga barangay Marigondon, dakbayan sa Lapulapu. Si Abadiano kinsa giingong bag-o lang naayo human operahi sa iyang appendix naguol gumikan sa dako pang utang niini sa usa sa mga tambalanan sa dakbayan sa Sugbo diin siya operahi.
Niadtong Domingo sa udto gipangita kini sa kabanay aron maniudto apan wala na nila igkita. Sa dihang gisusi nila ang lawak niini didto nagbitay na kini nga wala nay kinabuhi.
Samtang si Roman giingong masulob-on nga nagbantay sa ilang tindahan niadtong Sabado.
Dihang tingpaniudto na gipangita na kini sa iyang amahan kay wala naman sa gilingkoran niini sulod sa ilang tindahan.
Human masuta nga wala manumbay, gisil-ing sa iyang amahan ang ilang pansayan ug didto maoy nakita niini ang nagbitay niyang anak nga wala na usay kinabuhi.
Wala hisayri sa mga ginikanan ang suliran sa ilang anak nganong naghikog kini.
Ang mga kapolisan sa Argao ug sa dakbayan sa Lapulapu kinsa misusi sa maong mga ulitawo nga naghikog wala makakita og timailhan nga gituyo kini sa pagpatay. (/WC)