CEBU, Philippines - Maayong pagkapaig sa usa ka 85- anyos nga lolo human kini maapil og kasunog sa naugdaw niyang payag taliwa sa katubhan sa sitio Kabulakan sa barangay Libho sa lungsod sa Tabogon kagahapon sa alas 7:00 sa buntag.
Ang biktima nga napaig na dihang naabtan sa mga polis ug mga bombero mao si Henobibo Andrin,85, byudo.
Matud ni PO1 Dario Sta. Teresa sa Tabogon Police Station dihang nahinabi sa Banat News naglung-ag ang biktima og pamahaw dihang nahitabo ang sunog. Gikatahong dunay kaubang batang apo si Andrin nianang buntaga apan milakaw kini sa wala pa moulbo ang sunog.
Gidudahang kalit nga miulbo ang sunog sa giluto sa biktima nga mikaylap sa bungbong sa iyang payag nga ginama sa gaay ug daling mikatap sa atop ug wala na mapugngi pa sa biktima.
Gidudahan usab nga na-trap kini maong wala kini makagawas ug tungod kay nahimutang man kini tungatunga sa katubhan ug layo kaayo sa labing duol nga silingan wala dayoy nakaresponde aron kini matabangan.
Gibanabana sa kapulisan ug kabomberohan nga moabot lang og P5 mil ang kinatibuk-ang danyos sa naugdaw nga payag. (BANAT NEWS)