CEBU, Philippines - Wala mabalaka ang mga tinugyanan sa panglawas dinhi sa rehiyon kalabot sa misteryusong sakit nga mipatay og 61 ka mga bata didto sa Cambodia.
Matud pa ni Regional Director Asuncion Anden sa Department of Health (DOH) 7 nga gipangandaman nila ang nagkalainlaing sakit nga langyaw nga dili makatugpa nganhi sa rehiyon.
Kini tungod kay matud pa niya, kanunay silang nagmonitor sa mga kaugmaran bahin sa mga sakit nga gikan sa gawas pinaagi sa World Heath Organization (WHO).
Dinhi sa Sugbo ug sa tibuok rehiyon 7, gisandigan ni Anden ang katakus sa mga doktor ug kahimanan sa Vicente Sotto Memorial Medical Center (VSMMC) nga mosuta dayon sa mga sakit sa matag pasyente nga mokonsulta kanila.
Ang pamahayag ni Anden gisegundahan usab ni Dr. Gerardo M. Aquino, ang hepe sa VSMMC kinsa mapasigarbuhon kaayo sa mga modernong kahimanan nga anaa sa maong tambalanan nga ubos sa pag-atiman sa DOH.
Hinuon bahin sa misteryusong balatian nga miatake karon sa Cambodia, sila si Anden ug Aquino mipasabot nga wala pa sila makadawat og opisyal nga pahibawo niini gikan sa ulohang buhatan sa DOH. Sayo niini gialerto sa DOH Manila ang Bureau of Quarantine (BOQ) buwahan kun ugaling may mga timailhan man nga madala sa hangin, tawo ug sa uban pang karera ang maong matang sa sakit nganhi sa Pilipinas, masusi dayon sa mga tinugyanan sa BOQ ang kinsa mang mga tawo nga gikan sa gawas nga motugpa ug modunggo sa tanang tugpahanan ug pantalan sa nasud.
Kini agi og pagsanong sa kagamhanan sa nasud sa awhag sa mga tinugyanan sa panglawas sa Cambodia ngadto sa kasikbit nga mga nasud niini sa Asia sa kapeligro sa maong matang sa sakit busa angay kining bantayan.
Sumala sa mga tinugyanan sa Health Ministry sa Cambodia nga niadtong buwan sa Abril, ning tuiga, namatay ang 61 sa 62 ka mga bata nga ubos sa 7 anyos ang edad kinsa nataptan sa maong sakit ug nadala sa nagkalainlaing tambalanan sa maong nasud.
Wala pa nila madiskobre kun diin magsukad ang maong sakit, sa tawo ba o hangin, basta ang nasuta sa mga doktor sa maong nasud nga una kabsi sa kinabuhi ang mga biktima, nasugamak kini sa bug-at nga hilanat, dayon gisundan sa nagkalainlaing sakit sa baga nga maoy nakaingon sa kamatayon sa mga biktima.
Gumikan niini si Dr .Anden ug Dr. Aquino miawhag sa tanang molupyo ning lalawigan ug sa tibuok Central Visayas nga magmatngon sa kanunay ug kun may sakop sa panimalay nga takbuyan sa bug-at nga hilanat kinahanglang di maglangan og panahon ikonsulta dayon sa doktor. (/WC)(BANAT NEWS)