CEBU, Philippines - Gipanghingusgan sa kagamhanan karon nga mapalambo ang produksyon sa mais nga gitawag nga bio-technology (BT) corn.
Mao kini ang gibutyag kagahapon ni Wilberto Castillo, hepe sa Regional Crop Protection Center sa Department of Agriculture (DA)7 sa tulomanon AGIO Forum nga gipabati sa kahanginan pinaagi sa DYMR, ang estasyonan sa goberno.
Gibutyag ni Castillo nga nagkadako ang panginahanglan sa produkto sa mais karong panahona tungod kay gawas nga mao kini naandang konsumo ilabi na sa mga Sugboanon, gikinahanglan kaayo kining sangkap sa pagkaon sa mga hayop.
Matud pa ni Castillo nga labaw sa tanan gikinahanglan sa nasud ang komersyal nga aspeto sa mais busa gipaila niini ang gitawag nga hybrid corn o mahalon nga matang sa mais.
Apan gipasabot niya nga ang hybrid nga klase sa mais dali kaayong atakihon sa ulod ug uban pang matang sa dangan hinungdan nga kun dili kini aplayan og proteksyon sama sa modernong bio-technology nga pamaagi, di gihapon mosaler ang tinguha nga pagpalambo niini.
Iyang giasoy nga dinhi sa Cebu ang Bantayan Island ra maoy nagpasanay sa BT corn sa kaumahan niini nga mikabat sa 3,000 ektaryas.
May ginagmay usab nga umahan sa BT corn sa lungsod sa San Remegio ug Medellin nga pulos tua sa norte nga bahin sa lalawigan samtang sa habagatan walay kaumahan sa BT corn.
Matud niya nga ang ubang bahin sa rehiyon 7 nga may kaumahan sa BT corn mao ang Bayawan, Siaton ug Mabinay, samtang sa Bohol ang Marcela mao ray may kamaisan nga BT corn.
Kini tungod kay gibaoran sa kagamhanan sa Bohol ang ilang mga mag-uuma nga dili patanumon sa BT corn tungod mituo sila sa kampanya sa mga grupo sa gitawag nga environmentalist nga ang mga produkto kuno nga gitemplahan og bio-technology nga mga kemikal makadaot sa lawas sa tawo.
Apan gipanghimakak kining tanan ni Castillo tungod kay sukad makabaton og produksyon sa BT corn dinhi sa nasud gikan sa tuig 2003 hangtod karon walay nabalitaang nangamatay gumikan kay nakakaon niining matanga sa mais.
Hinuon matud pa ni Castillo nga sukad sa tuig 2003 , ang nasud nga may 10,000 lang ka ektaryang kaumahan sa BT corn kansang katibuk-ang produksyon mikabat lang sa 25 milyones metriko toniladas, apan sa pag-abot sa tuig 2010 mikabat na ang natamnang kaumahan og 540,000 ektaryas nga may 47 milyones metriko toniladas usab ang katibuk-ang produksyon niini.
Apan matud pa ni Castillo kuwang sa gihapon ang maong gidaghanon sa gikinahanglang konsumo sa mais sa mga Filipino. Midugang siya nga sa tibuok nasud ang lalawigan sa Mindoro maoy nag-una sa produksyon sa BT corn, gisundan sa Isabela ug uban pa sa Mindanao ug dinhi sa Kabisay-an. - BANAT NEWS