CEBU, Philippines - Gumikan sa pagkamalampuson sa usa sa mga flagship program ni Governor Gwendolyn Garcia, ang Suroy-Suroy Sugbo inabagan sa Cebu Chamber of Commerce and Industry (CCCI) giila karon sa Department of Tourism (DOT) nga lig-ong kaabag alang sa pagpalambo sa turismo sa nasud ug nahimong haom ug sibo sa gipasiugdahang Tourism Campaign nga “Its More Fun in the Philippines”.
Kini ang gitug-an ni Assistant Secretary Domingo Ramon Enerio III sa DOT Planning and Promotions ngadto sa mga sakop sa media atol sa gipahigayong Tourism Congress 2012 didto sa Cebu International Convention Center (CICC) sa miaging adlaw.
Ang maong kalihokan may labot sa pagsaulog sa Cebu Business Month sa Cebu Chamber of Commerce and Industry. Gitug-an usab ni Enerio nga kining pag-promote sa mga maanindot nga talan-awon sa usa ka dapit o pinakasuok nga lugar, pinaagi sa Suroy-suroy Sugbo ni Gov. Garcia , usa ka matang sa pagpalambo ug pagpauswag sa usa ka lungsod ug pagpauswag sa patigayon sa turismo nga angayang sundon sa ubang mga lalawigan sa nasud. Gipadayag usab niya nga dako ang bintaha sa Sugbo sa ubang mga lugar gumikan kay aduna kini tugpahanan nga matugpahan sa nagkalain-laing rasa nga buot mobisita dinhi sa Sugbo.
Samtang ang gobernador sa iyang bahin mipadayag nga sa iyang katapusang termino isip gobernador, iyang giila ang idustriya sa turismo nga maoy usa sa mga hinungdan sa talagsaong paglambo ug pag-uswag sa Sugbo sa nasud ug lakip na usab sa tibuok kalibotan. - BANAT NEWS