CEBU, Philippines - Mga mahalong isda nanglutaw sa kadagatan sa habagatang bahin sa lalawigan sa Sugbo sulod na sa usa ka semana sumala pa sa Cebu Provincial Anti-Illegal Fishing Task Force (CPAIFTF).
Kini gibutyag atol sa tigum sa South Cebu Coastal Resource Management (CRM) Cluster diha sa lungsod sa Samboan kagahapon nga gitambungan sa mga representante sa lungsod sa Argao, Dalaguete, Alcoy, Boljoon, Oslob, Santander ug Samboan.
Matud pa ni CPAIFTF field coordinator Jeofrey Merencillo nga si Tony Villegas sa Argao Bantay Dagat Commission ang nibutyag sa maong panghitabo ug gikompirmar kini sa mga kasikbit nga mga lungsod.
Ang mga isda giilang mga pugapo (Lapulapu), suno, pantaan, kitong, ug uban pa nga mahalon ang klase. Gituohang gihiloan kini sa illegal fishers apan uwahing nangamatay tungod sa kadako sama na lang sa 36 kilong Kulasi nga milutaw sa Oslob. (BANAT NEWS)