CEBU, Philippines - Natapos na kagahapon ang pagpananom og 79,000 ka mga kahoy diha sa Malubog Watershed sa barangay General Climaco, dakbayan sa Toledo nga gipasiugdahan sa Cebu Energy Development Corporation ug Toledo Power Company nga ubos sa Global Business Power Corporation ug sa kagamhanan sa siyudad ug barangay.
Ang maong proyekto nga gitawag og “Kabilin” gisugdan niadtong tuig 2010 diin klase-klaseng kahoy ang gipananom ilabi na ang ‘fruit bearing trees’ diha sa 100 ektaryang luna sa dapit sa Malubog dam.
Tuyo niini nga dunay mapahimuslan ang mosunod nga mga henerasyon. Gipasidunggan usab kagahapon ang 47 nga miatiman sa maong kalasangan nga mga residente ra usab sa maong barangay.
Si Oscar Magallones, Regional Technical Director sa Bureau of Forestry mibutyag sa mga tigbalita tungod sa subsob nga pagpananom og kahoy dinhi sa Sugbo miabot na sa 46,000 ektarya ang kalasangan dinhi.
Sa probinsiya sa Sugbo duna pay 143,000 ektaryang kinahanglang tamnan og mga kahoy o i-rehabilitate nga karon gitabangan og pananom sa nagkadaiyang pribadong sektor, institusyon ug lokal nga mga kagamhanan.
Ang mga opisyal sa siyudad ug barangay pinangulohan ni Kapitan Antonio Canonigo mapasalamaton sa CEDC,GBP ug TPC sa maong proyekto.
Si Bise Mayor Daydee Zambo, anak ni Mayor Aurelio Espinosa ug ang mga opisyal sa CEDC, GBP ug TPC nananom og kahoy kagahapon. (BANAT NEWS)