CEBU, Philippines - Gipasakaan na og kasong pagpanglugos kagahapon sa hapon sa Criminal Investigation and Detection Group (CIDG)-7 ang duha ka Koreano nga gipasanginlang milugos sa duha ka Haponesang turista.
Nagtaptap sa ilang mga nawong ang duha ka suspetsadong sila si Jong Duk Lee ug Carl Park dihang gidala sa piskalya kagahapon, sila pulos nagtungha og English language diha sa dakbayan sa Lapulapu.
Ang duha gitumbok sa managhigalang Haponesa nga nag-edad og 20 ug 21-anyos. Bugtong ang 20-anyos lang maoy nakakuyog sa pagpasaka sa kaso inubanan sa mga babayeng polis.
Ang laing 21-anyos nga ikaduhang biktima miuli ngadto sa nasud sa Japan kagahapon sa buntag apan nagbilin na kini og pinanumpaang reklamo nga gibasehan sa CIDG sa pagpasaka og kaso.
Matud pa ni SPO2 Roel Leyson gitutukan sa mga opisyales sa Japanese embassy ang maong kaso ug miabag usab sila sa mga biktima alang sa pagpasaka sa maong kaso.
Ang usa sa mga suspek gikatahong anak sa tag-iya sa usa ka hotel sa Lapulapu. Samtang si Lee kinsa nagdumili sa pagpa-interview mipakita lang sa iyang hulagway nga kauban si Justice Secretary Leila De Lima.
Ang Consultant sa Korean consul nga si Jose Go miadto usab sa CIDG-7 ug nagpakisusi sa nahitabo samtang si Charlie Shin, nga bise presidente sa Cebu Koreans Community Association mikuyog usab kang Go.
Matud ni Atty. Benjamin Negapatan, abogado sa mga Koreano walay nahitabong pagpanglugos sulod sa usa ka motel sanglit usa ra man ka kwarto ang ilang giukopahan ug nagparespares ang ilang mga kliyente ug ang mga reklamante niadtong Sabado sa kaadlawon.
Ang 20-anyos nga Haponesa niadto pang Hunyo 21 miabot sa Sugbu aron bisitahon ang nabiktima usab nga 21-anyos niyang higala kinsa nagtuon usab og English.
Ang grupo ni Chief Inspector Fermin Armendarez III midakop ni Park niadtong Sabado sa buntag diha sa gipuy-an niini sa Sunny Hills, sa barangay Talamban samtang si Lee nadakpan usab sa CIDG-7 sa dihang mibisita kini kang Park niadtong Sabado sa hapon. ( EIM) - BANAT NEWS