CEBU, Philippines - Sa dili madugay mahimo nang Talisay City State College (TCSC) ang Talisay City College (TCC) karon kun kaaprobahan ang balaodnon nga gipasaka ni Kongresista Eduardo Gullas sa unang distrito sa lalawigan ngadto sa kongreso.
Mao kini ang gibutyag ni Gullas sa taga media kalabot sa iyang mga laraw nga padak-on niya ang maong kolehiyo.
Gani matud pa niya nga mga 20 ka tuig gikan karon dako og purohan nga mahimo nang unibersidad ang TCC.
Nalipay kaayo ang kongresista sa unang distrito human niya hisayri gikan sa Commission on Higher Education (CHED) nga ang TCC usa sa labing maayong kolehiyo sa nasud. Ang TCC upat na ka higayon nga kanunay may graduwado niini nga masagol sa top 10 sa Licensure Examination for Teachers (LET).
Ang kongresista nanghinaot kini nga mamintenar sa TCC ang maong standing kay nakatabang kaayo kini og dako sa mga kabus nga Talisaynon kay imbis P18 mil ngadto sa P20 mil ang tuition sa kursong nursing matag semester sa ubang eskuylahan, sa TCC tag 3 mil ra.
Ang TCC natukod niadtong si Gullas mao pay mayor sa dakbayan sa Talisay ug gipanghinaot niya nga ang iya nang apo nga si Samsam Gullas kinsa maoy gituboy niyang mopuli sa iyang katungdanan sa kongreso mopadayon sa tanan niyang maayong mithi sa dakbayan sa Talisay ug uban pang mga siyudad ug lungsod nga sakop sa maong distrito. (BANAT NEWS)