CEBU, Philippines - Kompiyansa ang Liberal Party (LP) sa unang distrito sa Sugbo nga malabwan ang apo ni Kongresista Eduardo “Eddiegul” Gullas nga si Gerald Anthony “Samsam” Gullas Jr. nga maoy gituboy nga mokandidato sa pagka-kongresista sa umaabot eleksiyon sa sunod tuig.
Kahinumduman nga niadtong Biyernes si Samsam giproklamar kini sa iyang apohan ug sa Alayon Party niini nga maoy mosunod sa iyang tahas isip pagka-kongresista sa unang distrito.
Si Konsehal Romeo Villarante sa dakbayan sa Talisay kinsa ubos sa landong sa LP nagkanayon nga si kanhi Kongresista Jose “Dodong” Gullas nga manghud ni Eddiegul napildi sa oposisyon sa dakbayan sa Talisay sa tuig 2001 nga eleksiyon.
Malaumon si Villarante nga pinaagi sa paningkamot sa oposisyon masubli nila kini sa eleksiyon sa 2013.
Si Samsam nakakuha na og suporta sa kinabag-an sa mga lider sa mga kalungsoran sa unang distrito atol sa pagpaila kaniya niadtong milabay’ng Biyernes.
Si Samsam nagkanayon niadtong Biyernes nga andam na siya sa politika ug mohimo siya og kaugalingong pangalan sama sa nahimo sa apohan ug dako ang iyang pagsalig sa suportang gihatag kaniya sa mga lider sa nagkadaiyang lungsod ilabi na sa iyang pamilya. (BANAT NEWS)