Hunyo 23
CEBU, Philippines - 1898—Giwagtang ni kanhi Presidente Emilio Aguinaldo ang Diktadoryang Gobiyerno nga iyang gitukod niadtong Hunyo 18,1898 ug giilisan kini og Revolutionary Government ug siya maoy mamahimong “revolutionary president” sa maong panahon. Ang deklarasyon ni Aguinaldo natigayon onse ka adlaw human niya ideklarar ang Kaugalingnan sa Pilipinas gikan sa mga kamot sa mga Espanyol.
2002—Namatay si Alice Stewart, ang babayeng gibansagan kaniadto og “the woman who knows too much” tungod sa pagbutyag niya sa mga dautang epekto sa panglawas sa tawo sa sobrang exposure sa radiation sa x-rays, nuclear radiations, ug bisan na sa mga epekto sa panglawas sa mga trabahante sa pabrika sa mga eksplosibo, carbon tetrachloride, ug ang nagkadaghang nasakit sa mga trabahante sa pabrika sa mga sapatos. Niadtong 1974 miretiro sa iyang pagka-doktor ug epidemiologist mihimo siya og pagtuon sa epekto sa radiation sa mga trabahante sa Hanford plutonium production plant sa Washington. Migawas sa iyang pagtuon nga peligro ang bisan gamay nga exposure sa maong kemikal nga magbunga og sakit nga kanser. Tungod sa iyang pagdukiduki nabisto nga ang mga reports sa maong industriya kabahin sa epekto niini sa panglawas pulos gimaniobra. Nahatagan si Stewart og pasidungog nga Right Livelihood Award niadtong 1986.
1995—Mitaliwan si Jonas Salk nga usa ka Amerikanong-Hudiyo nga medical researcher ug maoy nakahimo sa labing una, epektibo ug luwas nga bakuna batok sa sakit nga poliomyelitis. Gamit ang tulo ka strains sa virus sa polio iyaha kining gibuhi ug giobserbahan sa unggoy ug human mosanay iyahang gikuha ang maong mga kagaw gipadaghan og maayo sulod sa usa ka semana ug pagkahuman gibutangan og formaldehyde (formalin) aron mamatay.Nadiskubrehan niyang kinahanglang tulo ngadto sa upat ka injections sa patay nga virus ang gikinahanglan aron mahimong immune ang usa ka tawo sa sakit nga polio. (BANAT NEWS)