CEBU, Philippines - Gipanghimakak sa duha sa tulo ka mga suspetsadong tulisan sa forwarding firm sa barangay Looc sa dakbayan sa Mandaue sa nakalabay’ng Abril ang pasangil nga naglambigit kanila sa maong pagpanulis.
Ang mga suspetsado nga mipadala og linagdaang pamahayag mao sila si Reynante Peracueles Roquero, alyas Yokyok, taga Molave, Zamboanga del Sur ug Claudio Castillo alyas Ompong nga taga Paypay, Pagadian City.
Ang duha gipasanginlang maoy mitulis sa APL Trucking Company niadtong Abril 18 ning tuiga.
Ang suwat gipadala gikan sa Ozamis City ug nadawat sa Mandaue City Police Office niadto pang Hunyo 5.
Si SPO2 Marcos Noval sa Investigation Detection and Management Bureau (IDMB) sa Mandaue City (IDMB) nga nahinabi sa Banat News miingon nga ang ikatulong suspek nga si Martin Lico alyas Bogart wala malakip sa mipadala sa maong suwat.
Matud pa ni Noval nga unang higayon nilang nasinati nga gipaagi sa suwat ang panghimakak sa suspek sa usa ka krimen apan nahibulong sila niini tungod kay ang affidavit nga gi-subscribed sa mga suspetsado sanglit penetsahan kini og Abril 5 nga ang tulis nahitabo man sa Abril 18.
Sa nasayran nga ang tulo ka tulisan sa maong pagpanulis nakuhaan og video footage sa maong kompanya diin sila nailhan. (BANAT NEWS)