CEBU, Philippines - Gipahibalo kagahapon sa national secretary general sa Kabataan partylist nga si Vencer Crisostomo nga mohimo ang ilang grupo og nagkadaiyang konsultasyon kalabot sa kontrobersyal nga House Bill 633.
Ang HB 633 o Religious Freedom in Government Office Act giduso sa representante sa maong partylist nga si Kongresista Raymond Palatino nga nagdili na sa mga ‘religious symbols’ sa mga opisina sa gobiyerno ug publikong lugar.
Kini miani og pagsaway sa publiko ilabi na sa mga religious leaders ug mihulagway niini nga usa ka matang sa pagpanghilabot sa kagawasan sa tawo sanglit wala gani kini moagi og konsultasyon.
Sumala pa ni Crisostomo nga nahinabi sa Banat News kagahapon nga nasayod sila sa mga pagsaway apan iyang giklaro nga duna sila’y konsultasyon nga himoon ug ang resulta niini ilaha gyud nga tumanon.
“Hindi po naming kagustohan na may ma-offend sa amin. Hihingi po kami ng patawad kung merong na-offend sa amin. Kung ano ang kalalabasan sa gawin naming konsultasyon, susundin po namin yun,” matud pa ni Crisostomo dinhi sa Banat News.
Lakip sa dayag nga misupak sa maong balaudnon mao si Archbishop Emeritus Ricardo Cardinal Vidal nga miisip sa mga Sugbuanon nga mga relihiyoso ug nahimong kabahin na sa kultura ang pagbutang sa Imahen sa Senyor Sto. Niño sa ilang mga trabahoan. Si Mayor Michael Rama supak usab sa maong balaudnon gumikan kay makaguba kini sa tradisyon ug iyang panghinaut nga dili na lang kini padayonon. (/EIM) (BANAT NEWS)