CEBU, Philippines - Dunganon pagsubo karong adlawa ang mga nagkadaiya nga proyekto sa 10 ka mga barangay ning dakbayan.
Gitakdang bisitahan ni Mayor Michael Rama ang Barangay Buhisan, Toong, Kalunasan, Pamutan, Apas, Pit-os Binaliw, Agsungot, Guba ug Sirao diin siya moputol sa mga ribbon agi og timaan sa opisyal nga pagsubo sa mga proyektong infrastraktura sa maong mga barangay.
Ang maong mga proyekto naglangkob sa drainage system, ug road concreting nga mobalor og P27 million.
Sa laing bahin si Kongresista Tomas Osmeña sa habagatang distrito sa dakbayan sa Sugbo maoy mopapanumpa sa mga opisyal sa Cebu City Senior Citizens Alliance nga gipangulohan ni Engr. Edgar Batiquin sa Pahina Central. Ang maong induction nga ipahigayon didto sa Grand Convention Center sa Banilad sa alas 10:00 sa buntag ugma, Biyernes pagatambongan sa mokapin sa 200 ka mga opisyal ug mga bisita sa maong kapunongan.
Matud pa ni Batiquin nga usa lang ang ilang tumong niini, nga mao ang paghiusa nilang mga edaran sa pagpaluyo kang Osmeña. (Sanden J. Anadia/WC)
Nabulit sa pinusilan gituohang gi-salvage
Ni Darrel Carumba
Nabulit sa mga samad sa bala ang lawas patay sa usa ka tawo kinsa gituohang gi-salvage ug nagbuy-od daplin sa karsada didto sa Sityo Kanohoy barangay Bulasa lungsod sa Argao kagahapon sa alas 5:30 sayo sa buntag.
Ang biktima kinsa wala hiilhi sa kapolisan gamayon og lawas, itumon, may 5’4 ang gitas-on ug nagpangidaron og 30 anyos kapin kun kulang nga nagsul-ob og puti nga t-shirt ug maong nga short.
Si PO3 Rodrigo Teo sa Argao Police Station mibutyag sa Banat News nga ang biktima adunay samad pinusilan sa ulo ug sa nagkalain-laing bahin sa lawas nga maoy nakaingon sa hinanali niining kamatayon.
Nagtuo ang kapolisan nga malagmit gi-salvage ang biktima sa laing lugar ug didto lang ilabay sa daplin sa karsada sa Kanohoy.
Gidudahan usab nga may deperensiya kini sa pangisip tungod sa hugaw niyang senina.
Ang kapolisan nakapunit og duha ka lumping nga bala sa kiliran sa biktima.
Gipahimutang ang haya niini sa Tupas Funeral Parlor sa dakbayan sa Carcar aron masil-ing sa mga tagtungod. (BANAT NEWS)