CEBU, Philippines - Gatosang mga kabus ang nakabenepisyo sa libreng “medical-dental-legal- haircut mission” sa barangay Bunga, dakbayan sa Toledo niadtong Sabado nga gihimo diha sa Bunga Elementary School.
Dul-an sa 600 ka mga kabus nga mga residente sa lugar ang nakapahimulos niini, diin 392 mga bata ug dagku ang nakapahimulos sa medical check-up ug nahatagan og libreng tambal ug bitamina.
Samtang 106 ka mga bata ug dagku ang nakapahimulos sa libreng ibot sa ngipon ug 16 ka tawo ang nakapahimulos sa libreng legal advice ug 65 ka mga bata ug dagku ang nakapahimulos sa libreng tupi.
Ang maong civic mission gihimo sa Alpha Battery, 1901st Ready Reserve Brigade, 701st Community Defense Center (CDC), 7th Regional Community Defense Group (7RCDG), Army Reserve Command (ARESCOM), 8th Infantry Division (8ID), diha sa Central Command.
Kaabag nila ang Viscal Development Corporation, Carmen Copper Corporation ug mga opisyal sa barangay Bunga ug dakbayan. Ang pagpahigayon sa maong kalihukan ubos kini sa Peace & Development Operation sa armadong kusog sa nasud. BANAT NEWS