CEBU, Philippines - Naangol ang usa ka tawo human kini pareglahi og dunggab sa usa ka babaye sa diskohan sa sitio San Antonio sa barangay Guinsay, sa dakbayan sa Danao sa miaging gabii.
Ang biktima mao si Roberto Dinoy Quimco, 20, ulitawo nga taga barangay Hagnaya, lungsod sa Carmen ug ang nakadunggab mao si Leny Castillo Baro, 22, nga taga barangay Fuente sa mao gihapong lungsod.
Si SPO4 Edgar Gomez sa kapolisan sa maong dakbayan nga nahinabi sa Banat News miingon nga mitan-aw ang biktima sa nagsinayaway sa disko sa maong higayon diin didto usab ang sa suspetsado.
Apan matud pa ni SPO4 Gomez nga samtang nalingaw ang biktima sa pagtan-aw sa nagsinayaway kalit lang kining giluba sa suspetsado sa wala’y igong hinungdan.
Nasabak sa dughan ug tiyan ang biktima ug dali kining gihatod ngadto sa Danao Provincial Hospital apan gibalhin kini dayon ngadto sa Vicente Sotto Memorial Medical Center sa dakbayan sa Sugbo tungod sa katalandugon sa kahimtang.
Hinuon nadakpan dayon ang suspetsado pinaagi ni Elmo Talingting nga barangay tanod sa maong lugar ug gitahan kini ngadto sa buhatan sa kapolisan.
Si SPO4 Gomez miingon nga dihang ilang gisukit ang suspetsasdo, igo lang kining miingon giluba niya ang biktima kay giganahan siya bisan dili niya kini kaaway.
Sa pagkakaron nagkagulkol na siya sa prisohan samtang gipaabot ang tukmang kiha nga ipasaka sa biktima batok kaniya. Samtang sa laing bahin samdan usab sa bukton ang usa ka retiradong kawani sa gobiyerno human kini dunggaba sa iyang kontra didto sa sitio Upper Tac-an, barangay Budlaan ning dakbayan sa Sugbo sa miaging hapon.
Ang biktima nailhan nga si Pablo Jakosalem, hingkod nga taga Tac-an ug kanhi trabahante sa gobiyerno, samtang ang suspetsado mao ra usab ang iyang silingan nga dugay na niyang kaaway nga si Ramil Sungkal, 37.
Nasayran nga nagduwa og dama ang biktima kauban ni konsehal sa Jade Bayuma sa Budlaan dihang giluba kini sa suspetsado.
Gumikan sa kaabtik managang sa biktima wa masabak ang iyang lawas sa kutsilyo sa suspek apan didto kini sa iyang tiyan motaroy.
Gihatud dayon siya ngadto sa Cebu City Medical Center samtang ang suspek kinsa nasikop dayon sa kapolisan nagkagulkol na karon sa prisohan samtang nagpaabot sa kaso nga ipasaka batok kaniya. (/WC)(BANAT NEWS)