CEBU, Philippines - Gipangalantawang mogamay kun di man makapahunong unya sa mga batan-on nga magbisyo kun mahingpit na nga balaod ang House Bill 5727 o Sin Tax Bill nga tumong patas-an pa og maayo ang buhis sa mga produktong bino ug sigarilyo.
Kini maoy gibutyag sa tigpamaba sa Akbayan- Cebu nga si Mikay Dumabok kansang grupo misuporta sa Sin Tax bill nga giduso nagdto sa Kongreso sa tuyo nga makatabang sa panudlanan sa gobiyerno gikan sa mga buhis sa ilimnong makahubog ug sa sigarilyo.
Ang maong balaudnon gipangamahanan ni Davao City District Kong. Isidro Ungab nga tuyong mopadako sa buhis sa mga kompanya sa bino ug sa mga sigarilyo aron ang kitaon makatabang sa pundo alang sa mga programa ug proyekto sa gobiyerno sa maayong panglawas sa mga Filipino.
“Duna man gu’y uban batan-on kung mahubog gani, mangita dayon og gubot. Ug tungod sa sin tax bill, maglisod na sila og palit og sigarilyo ug alcoholic drinks tungod sa kadako sa presyo,” matud pa ni Dumabok.
Nasayran nga pipila na ka mga grupo labi na kadtong medical ug health organizations ang mihangop sa maong balaudnon nga napasar na sa Ubos Balay Balauranan ug gikatakda nang tukion sa Senado.
Ang sin tax bill kon House Bill 5727 napanglantawang makadugang og P33 bilyones nga kita sa buhis apan gipaabot nga daghang mga kompanya nga maapektahan niini ang motiyabaw. (BANAT NEWS)