CEBU, Philippines - Nagtinguha ang South Cotabato nga maka-suplay og mga utanon ug mga prutas dinhi sa kamerkaduhan sa Sugbu tungod sa kadaghan sa mga konsumidor niini dinhi.
Kini maoy gibutyag ni Bai Dido Sum Ama chief of the Agri-business Division sa Department of Agriculture (DA)-12 kansang probinsya miapil sa tulo ka adlaw nga "2nd Visayas-Mindanao Fruits and Vegetable Market Encounter and Trade Exhibit" nga gibuksan niadtong Biyernes, Hunyo 8 hangtod Hunyo 10 ning tuiga didto sa SM City Cebu.
Malaumon si Ama nga sila pinaagi sa maong kalihukan makakita ang mga Sugbuanon sa mga produktong agrikultura nga mapalit gikan sa South Cotabato ug makabaton og koneksyon ang mga mag-uuma didto ug sa mga konsumidor dinhi aron mao kini mahimong labing dakong tumoranan unya sa ilang produkto.
Gitataw ni Cris Lucero, chief of the Agri-business Division sa Department of Agriculture (DA)-7 nga ang maong kalihukan nagtumong sa paghatag og kahigayonan niadtong mga prodyuser ug mga magpapatigayon og prutas, utanon, processed products, tuna ug humay gikan sa South Cotabato nga makigdugtong sa mga mamalitay dinhi sa Sugbo.
Sa report sa Philippine Information Agency si Lucero miingon nga 60 ngadto sa 70 porsiyento sa suplay sa mga prutas ug utanon sa Sugbo ug ubang parte sa Central Visayas nagagikan sa Mindanao.
Matud pa ni Lucero gikinahanglan hugot nga koneksyon ang mga prodyuser ug kunsomidor aron masiguro ang paglambo sa industriya sa agrikultura ug makatampo kini sa pagpatubo sa ekonomiya.
Moabot ngadto sa 30 ka mga exhibitors gikan sa ilang rehiyon ang misalmot sa tulo ka adlaw nga market and trade fair.
Sanglit ang Mindanao naila nga food basket sa nasud giklaro ni Lucero nga kabahin sa mandato sa DA ang pagtabang sa mga mag-uuma didto nga makakita og katumoran sa ilang mga produkto dinhi sa Kabisay-an.
Si Romano Laurilla, usa sa mga exhibitors ug mipailaila sa iyang produktong organic rice (bugas humay nga wala gamiti og kemikal) malaumong pinaagi sa maong exhibit makakuha sila og pahat sa merkado sa Sugbu aron makabaligya sila dinhi.
Si Laurilla sakop sa usa ka kooperatiba nga nagtumod og mga organic rice sa Manila mapasigarbuhong miingon nga sila maoy una dinhi sa nasud nga naka-export og organic rice ngadto sa Germany. (BANAT NEWS)