CEBU, Philippines - Upat ang naangol human nagkabangga ang pasaheroang multicab ug sa gikasugat nga motorsiklo ug traysikol dayon didto sa usa ka payag sa highway sa barangay Maslog sa siyudad sa Danao kagahapon sa alas 9:10 sa buntag.
Ang drayber sa pasaheroang multicab dunay rota nga Danao -Cebu City mao si Roxann Sabas, molupyo sa barangay Sabang sa siyudad sa Danao.
Samtang ang drayber sa traysikol nga napagan sa panagbangga ug naangol mao si David Calvo Jr., taga barangay Malapok, Danao City ug duha ka mga pasahero nga sila si Carmelito Berdon, 49 ug Maria Liez Baton, 32.
Samtang ang laing napagan mao ang drayber sa motorsiklong si Markqueen Anagod, taga Canamokan, Compostela.
Subay sa imbestigasyon ni SPO1 Renante Manulat, traffic investigator sa Danao City Police Station nagbiyahe ang multicab paningon sa siyudad sa Danao ug misuway og overtake sa gisundang traysikol pag-abot sa maong lugar apan naatol nga niagi ang sugat nga motor ug nisampot sa panagbangga.
Ang motorsiklo nga nituyok didto mobanda sa traysikol ingon man ang multicab ug nilahos pagdumbol sa usa ka payag nga gipanag-iya ni Florencio Lucero diha sa daplin sa karsada.
Ang mga naangol nga drayber sa traysikol ug duha ka pasahero ini ug drayber sa motor daling gihatod sa Danao City District Hospital ug gibalhin sa tambalanan dinhi sa dakbayan sa Sugbo.
Ang drayber sa multicab mitahan sa kapulisan human sa hitabo ug kasamtangang giimbestigar. (BANAT NEWS)