CEBU, Philippines - Ang mga balay patigayon sa dakbayan sa Talisay gimandoan nga magpataod og mga close circuit television (CCTV) subay sa ordinansa sa siyudad.
Sa ordinansa nga naaprobahan sa konseho sa maong dakbayan gimando nga tanang mga bangko, mall, gasoline station, supermarket, pawnshop, money changer, 24 hours nga convenience store, tunghaan, fast food restaurant/quick service restaurant ug car display centers kinahanglang magpataod og CCTV.
Gitino sa maong ordinansa nga ang mga establisamento nga adunay kapital nga dili mokubos sa P1 milyon base sa ilang record sa Business Permit and Licensing Office maoy kinahanglang magbaton og CCTV.
Sa maong balaod gimandar usab nga ang mga na-record nga hitabo sa CCTV sa usa ka balay patigayon kinahanglang dili papason sulod sa usa ka buwan aron ma-review kini pag-ayo ilabi na kun may krimen nga nahitabo.
Si Bise Mayor Alan Bucao kinsa maoy nangamahan sa maong ordinansa nagkanayon nga ang mapakyas sa pagtuman sa maong balaod sa siyudad hatagan una kini og pahimangno sa unang kalapasan apan sa ikaduhang kalapasan pabayaron na kini og P2,500 nga multa ug P5,000 sa ikatulong higayon.
Sa laing bahin, si Interior and Local Government Secretary Jesse Robredo miawhag sa tanang mga mayor sa kalungsoran ug dakbayan nga magbutang og CCTV cam sa ilang lugar aron makatabang sa pagsulbad sa krimen nga mahitabo sa ilang palibot.
(BANAT NEWS)