CEBU, Philippines - Naulian na ang 41 ka mga batang tinun-an sa Totolan Elementary School sa lungsod sa Dawis sa Bohol nga nangahilo tungod sa pagkaon nila og tubatuba niadtong Sabado sa udto.
Ang maong mga bata gikatahong mikaon sa liso sa tubatuba nga gituohan nilang gisangag nga mani.
Nasuta nga gikan ang maong mga tubatuba sa luyong bahin sa eskuylahan ug naatol nga daghan na kini og guwang nga bunga ug ang mga liso susama na og mani og lami maong ilaha kining gikaon human sa tingpaniudto.
Apan gikatingala sa magtutudlo nga nagdungan og reklamo ang mga bata nga nagsakit ang ilang mga tiyan ug ang uban kanila nalipong na ug uban usab nagsuka.
Ang mga magtutudlo daling nagpatabang sa ilang school principal aron dad-on sa tambalanan sa Gov. Celestino Gallares Memorial Hospital ang mga bata diin gihatagan dayon sila og intravenous fluids aron maulian. Sa report sa ABS-CBN Central Visayas, ang doktor sa maong tambalanan nga si Dr. Suzzette Redillos mipahibalong hinay-hinay nang naulian ang mga bata.
Sumala pa usab sa maong report ang DepEd sa Bohol mopakatap og impormasyon ngadto sa kabataan ug mga ginikanan sa paglikay sa pagkaon sa bunga sa maong tanom. (BANAT NEWS)