CEBU, Philippines - Wala pa bayari sa kagamhanan sa siyudad sa Sugbo ang obligasyon niini sa Asian College of Technology (ACT) nga moabot ngadto sa P61M alang sa duha ka semesters nga bill sa mga scholars sa siyudad nga nag-eskwela sa maong tunghaan.
Hinuon ang tag-iya sa ACT nga si Konsehal Rodrigo “Bebot” Abellanosa mipadayag nga wala siya magdali ug andam siya magpaabot kung kanus-a siya bayran sa siyudad.
Samtang si Konsehal Joey Daluz kinsa maoy nagdumala sa scholarship program sa siyudad misaysay nga nagpadayon pa ang gibuhat nga “tax examination” sa maong tunghaan hinungdan nga wala pa kini mabayri. Sumala pa ni Daluz nga bisan pa man nga duna pa’y balanse ang siyudad sa ACT, padayon gihapon nanawat og mga scholars ang ACT.
Dugang pa niya nga duna na’y ubang eskwelahan ang nabayran sa siyudad gumikan kay naka-comply kini sa mga dokumento nga ilang gipangita. (BANAT NEWS)