CEBU, Philippines - Gipahimangnoan sa Department of Social Welfare and Development (DSWD)-7 ang publiko ilabina sa mga benipisyaryo sa Pantawid Pamilyang Pilipino Program 4P’s nga magbantay sa mangingilad pinaagi sa text scam nga mikatap karon sa palibot.
Si Aileen Lariba sa DSWD 7 mibutyag sa Banat News kalabot sa nadiskobrehan nilang text scam gikan sa nagpailang usa ka Lea Ramos.
Ang unod sa maong text message niini nagpahibawo sa usa sa mga benipisyaryo sa 4P’s nga midaug kini og dakung kantidad sa kwarta sa raffle promo sa DSWD gikan sa maong program.
“Congratulation, President Noy-noy Aquino Foundation 4P’s Pantawid Pamilyang Pilipino Program, your sim # won P950,000 as second prize winner in the Handog Pangkabuhayan raffle promo, DTI 0154s’12,” mao kini unod sa text message nga nadawat sa usa mga benepisyaryo sa 4Ps.
Giklaro sa DSWD-7 nga dili kini tinuod ug usa kini ka pagpangilad.
Busa kadtong makadawat sa susamang mensahe gi-awhag ni Lariba nga dili magpatonto ug labing maayo nga isumbong dayon kini sa ilang buhatan pinaagi sa telepono 232-1192 local 123.
Mahimo usab nga i-text ang maong reklamo ngadto sa Pantawid Pamilya Grievance Text Hotline sa DSWD7 sa numero 0918-912-2813. (BANAT NEWS)