CEBU, Philippines - Maayong pagkapusgay sa ulo sa usa ka lalaki ug laing duha ang anaa sa kritikal nga kahimtang sa panagbangga sa duha ka motorsiklo apil na sa usa ka multicab sa highway sa barangay Arpili lungsod sa Balamban kagahapon sa alas 6:45 sa buntag.
Ang patay diha-diha ug nagkirigkirig pa nga naabtan sa mga polis mao ang drayber sa Honda Wave motorcycle nga si Alexander Sotes, 54, taga barangay Sta. Cruz, Balamban ug nagtrabaho sa Atlas Mining Corporation sa siyudad sa Toledo. Samtang ang drayber ug angkas sa gikabangga niyang laing motorsiklo nga sila si Lloyd Tombaga, ug ang angkas niining si Nicanor Candoli, 38, pulos talandugon ang kahimtang.
Giimbestigar usab ang drayber sa multicab nga si Michael Desabella, 45, taga Toledo City diin mapasok si Sotes gikan nabangga sa motorsiklo ni Tombaga
Matud ni PO2 Godofredo Dumdum sa Balamban Police sa Banat News si Sotes paingon sa Lutopan aron motrabaho ug nagsunod kang Desabella ug gikasugat sa pikas lane sila si Tombaga. Pag-abot sa maong lugar gikatahong kalit mi-overtake si Sotes sa multicab apan mao say pagbutho ni Tombaga hinungdan sa ilang panagbangga ug miresulta sa pagkalagpot ni Sotes sa atubangan sa multicab ni Desabella ug napusgay ang ulo.
Si Desabella mitahan dayon sa kapulisan human sa hitabo ug nabalhog karon sa karsel samtang gihikay ang kasong ipasaka batok kaniya. (BANAT NEWS)