CEBU, Philippines - Pormal nang gisugdan ang klase sa unang ang-ang (first grade) sa K to 12 program sa Department of Education (DepEd) 7 sa Central Visayas dungan sa opisyal nga pagsugod sa klase sa mga tulunghaang elementarya ug high school sa tibuok nasud kagahapon.
Ang motungha karon sa Grade 1 kinahanglang molatas sa Grade 2, 3, 4, 5, 6, 7, 8, 9, 10, dayon Junior High School ug Senior High School una pa makatungtong og kolehiyo.
Sa pakighinabi sa Banat News ni Nicomedes S. Tuap, Principal III sa Tejero Elementary School kagahapon nasayran nga sa wala pa sugdi ang pagpatuman sa K to 12 educational system sa DepEd daghang mga ginikanan ang nagbagulbol tungod sa kabalaka nga maglisud na sila pagpalampus og kurso sa kolehiyo sa ilang anak.
Hinuon matud pa ni Tuap nga sa tanto nilang pakighinabi sa mga ginikanan ug gipasabot ang tumong sa kagamhanan niining maong sistema sa edukasyon, napuypoy ang kayugot sa mga ginikanan ug igo nalang miingon nga antuson nalang nila ang tanan.
Subling gipasabot ni Tuap nga di angay mabalaka ang mga ginikanan ning bag-ong sistema karon sa edukasyon tungod kay daghang mga ahensya sa goberno nga moabag aron nga makabaton og maayo nga kaugmaon ang mga estudyante.
Usa niini mao ang Technical Education and Skills Development Authority (TESDA) nga maoy mohatag higayon sa mga mograduwar sa high school nga mabansay aron makasulod dayon og trabaho.
Apan kadtong may ikasarang mahimong mopadayon sa kolehiyo alang sa upat ka tuig nga kurso, matud pa ni Tuap.
Busa ang estudyante sa K to 12 system duha ang padulngan, molampos og kurso nga upat ka tuig o kaha moderetso panarbaho o pagnegosyo inigkatapos niya sa high school.
Gipasabot ni Tuap pag-usab nga gilusad kini sa kagamhanan aron ipahaom sa sistema sa edukasyon sa tibuok Asia diin nagpabiling Pilipinas na lang ang nagpatuman og 10-year educational system.
Gipangutana kun molahutay ba kaha kining maong sistema kun lain na usab ang administrasyon sa nasud, si Tuap nagkanayon wala nay higayon nga mahunong kini tungod kay usa na kini ka balaod. - BANAT NEWS