CEBU, Philippines - Mokapin sa 2 mil ka mga polis ang ipakatap sa nagkadaiyang mga tunghaan sa lalawigan sa Sugbo atol sa pagbukas sa klase karong Lunes.
Atol sa Talakayan sa Isyung Pulis (TSIP) Forum sa media center sa Police Regional Office-7 sa Camp Sergio Osmeña Sr. kagahapon sa buntag gipasalig sa kadagkuan sa PRO-7 nga higpit nilang ipatuman ang seguridad sa mga tinun-an sugod karong umaabot nga Lunes.
Si Sr. Supt. Orlando Ualat, Chief of staff sa PRO-7 nagkanayon nga wala pa hinuon silay tukmang lista sa gidaghanon sa ipakatap nilang mga polis sa tibuok rehiyon karon kay mag-agad man kini sa gidaghanon sa mga tunghaan sa tibuok Central Visayas ilabina dinhi sa Sugbo.
Hinuon iyang gipasalig nga aduna gyuy mga pulis ang makita sa mga tunghaan nga magbantay sa mga police assistance center nga ilang ibutang sa mga tulunghaang pribado ug publiko aron kaduolan sa mga tinun-an ug ginikanan nga makasugat og problema sa unang adlaw sa pagbukas sa klase karong Lunes. (BANAT NEWS)