CEBU, Philippines - Si Congressman Gabriel Luis R. Quisumbing sa sixto distrito sa lalawigan sa Sugbo mipahalipay sa senado sa pagpakanaog og usa ka makasaysayanong desisyon sa impeachment trial ni Chief Justice Renato C. Corona niadtong Martes.
Matud pa ni Quisumbing nga nalipay kaayo siya sa pagkakonbikto ni Corona pinaagi sa 20 sa 23 ka mga senador nga naglakip kang Senate President Juan Ponce Enrile nga mibotar nga guilty si Corona sa Article 2 sa Impeachment Case nga gipasaka batok niini.
Ang dakong hinungdan nga nahukman siyang guilty mao ang kapakyas ni Corona pagbutyag sa iyang mga kuwartang dollar ug mga kuwartang peso sa iyang Statement of Assets Liabilities and Networth (SALN).
"I am happy with the decision of the senator-judges and feel that justice has been done. Indeed, the overwhelming majority vote in favor of conviction is a strong statement for all public officials, especially those in high government offices, to comply with the standards our Constitution sets for public accountability. The Filipino people deserve nothing less," sigun pa ni Quisumbing.
Si Quisumbing miingon nga siya ug kaubang mga kongresista sa ubos balay balaoranan nga wala gyud masayop sa pagsang-at sa maong impeachment case batok kang Corona bisan og dili kini sayon apan ang naghingpit sa ilang tinguha mao ang kinabag-ang senador. (/WC)(BANAT NEWS)