CEBU, Philippines - Gipahimangnuan ni Cebu Archbishop Jose Palma ang mga katoliko nga mosalig ngadto sa mga senator judges kinsa gipaabot nga mopakanaog sa ilang hukom karong adlawa sa impeachment trial batok ni Chief Justice Renato Corona.
Karong adlawa mao ang adlaw nga giatangan nga mahibaloan na sa tibuok nasud kun ‘guilty’ ba o ‘not guilty’ si Corona sa tulo ka mga kasong gipasaka batok kaniya nga mga gihulagway nga pagluib sa pagsalig sa katawhan ug paglapas sa Konstitusyon.
Sa interbiyu sa TV Patrol Central Visayas, si Palma nagkanayon nga kinahanglan andam ang mga Filipino sa unsa mang hukom sa mga impeachment ug mosalig sa ilang katakos. Nagtuo si Palma ang desisyon magdala og kaayohan sa estado sa pamalaod sa nasud. Hinuon, si Palma miangkon nga ang proseso ug resulta sa impeachment ni Corona nagbunga og pagkabahinbahin sa katawhan apan nagtuo siya nga kinahanglan kini mahitabo aron magkahiusa ang mga Filipino.
“This is just a case where we can say that there is more things that unite us than the things that divide us,” matud pa niya. (BANAT NEWS)