CEBU, Philippines - Usa nalang ka semana sa dili pa pormal buksan ang klase sa pampubliko ug pribadong tunghaan sa elementary ug secondary, wala nay nakitang prolema ang kadagkuan sa Department of Education (DepEd) human nila gilusad ang Oplan Brigada Eskwela sa miaging semana sa tibuok rehiyon.
Apan kun unsa kaandam ang atong mga kadagkuan sa DepEd susamang kaandam na usab ang kapulisan aron malinawon ug walay mga insidente nga motumaw.
Sa interbyu kang Sr. Supt. Louie Oppus, Deputy Regional Director for Operation (DRDO) sa Police Regional Office-7 mitug-an nga dunay daghang pulis nga ipakatap atol sa pagsugod sa klase tibuok Central Visayas.
Matud niya nga ilang ideklarar sa tibuok Central Visayas nga red alert sa tanan nga police stations karong Lunes aron mahatagan og hugot nga siguridad ang mga kabataan sa unang adlaw sa klase. Tabangan ang kapolisan sa mga security guards ug mga police auxiliary force, sama sa tanod, Barangay Peacekeeping Action Team (BPAT).
Dunay mga police assistance centers ang ibutang aron maduolan sa mga ginikanan ug mga tinun-an kun dunay masugatang problema sa unang adlaw sa pagbukas sa klase.
Giawhag ni Oppus ang mga ginikanan ilabina kadtong dunay mga tinun-an sa elementarya nga bantayan pag-ayo ang ilang mga anak aron malikayan ang disgrasya ug di mabiktima sa mga krimen. Mipahimangno usab si Oppus ngadto sa mga school administrators nga pahugtan usab ang ilang seguridad ug dili lang isalig ang tanan ngadto sa mga ginikanan o mga tanod. - BANAT NEWS