CEBU, Philippines - Si Kong.Eduardo Gullas maoy usa sa labing ulahing miduso og balaudnon tumong sa pag-oktaba sa eleksiyon sa Barangay ug Sangguniang Kabataan.
Base sa rekord sa Ubos Bay-Balauranan, dul-an na sa usa ka dosenang mga balaudnon ang giduso sa mga kongresista aron i-uswag ang maong eleksiyon.
Giduso ni Gullas ang pag-oktaba sa eleksiyon ngadto na sa 2015.
Ang mga balaudnon usahon kini pagtuki sa House Committee on Suffrage and Electoral Reforms lakip na ang mga unang gipangduso sa mga kongresista.
Si Gullas ang nagduso sa House Bill 6147 tumong sa pagpahigayon sa eleksiyon sa Barangay ug SK sa ikaduhang Lunes sa Oktobre 2015 ug himuon ang eleksiyon matag lima ka tuig.
Usa sa nakitang rason ni Gullas nga iuswag ang piniliay sa mga opisyal sa Barangay ug SK mao ang kalisod karon sa ekonomiya sa nasud nga mosamot kung laing eleksiyon na usab ang ipahigayon sunod tuig.
Laing eleksiyon sa mga senador, kongresista ug mga lokal nga posisyon sa probinsiya, syudad ug kalungsuran ang ipahigayun sa Mayo 2013.
Human niini, isunod unta ang eleksiyon sa Barangay ug SK sa buwan sa Oktubre 2013 sama sa nahitabo niadtong eleksiyon sa 2007 ug 2010 nga duha ka eleksiyon ang gipahigayon sa samang tuig.
Apan duna say mga sugyot nga dunganon nalang ang tanang mga elected positions aron mausa ra ang gastos sa Comelec sa sunod tuig. (BANAT NEWS)