CEBU, Philippines - Ibutang sa kapulisan sa watchlist ang mga gun holders nga wala makapa -renew sa ilang mga pusil ug dili na sila makakuha pa og PNP clearance.
Si Chief Supt. Marcelo Garbo nagkanayon nga daghan gihapong mga gun holders sa Central Visayas ang wala gihapon maka- renew sa lisensya sa ilang armas ug kini gikunsiderar na nga loose firearms. Tungod niini ila karung gihingusgan pag-ayo ang pagpatuman sa Firearms Control Program aron maminosan ang problema sa loose firearms dinhi sa Central Visayas ilabina dinhi sa dakbayan sa Sugbu nga maoy kasagaran gigamit sa mga kriminal.
Matud ni Garbo nga ilang hagatan og unom ka buwan nga moratorium ang mga gun holders sa pag-renew sa ilang armas ug kundili, moisyu sila og revocation ug ideklarar kini nga loose firearms.
Sa labing ulahing records sa Firearms Explosives Security Agency Guards and Supervision Section (FESAGSS)-7 miabot og kapin sa 21 mil ka armas ang wala ma- renew ang lisensya.
Matud ni Garbo nga kining maong programa tipik ug kabahin kini sa ilang pagpangandam sa umaabot eleksyon sunod tuig. (BANATNEWS)