CEBU, Philippines - Aron maimplementar ang Labor Day commitment ni Presidente Benigno S. Aquino Jr. bahin sa pagpatuman sa Educational Assistance Fund Program (EAFP) ang Government Service Insurance System (GSIS) nagsugod na sa pagpanawat og mga aplikante alang sa GSIS-EAFP sa tanang aktibong miyembro niini.
Kini ang gibutyag kagahapon sa GSIS Manager Ma. Fatima Alvarez atol sa Special Kapihan sa PIA didto sa buhatan sa maong ahensya ning dakbayan.
Matud pa ni Alvarez nga sa maong programa hatagan og prayoridad ang mga anak sa mga miyembro sa GSIS nga anaa sa salary grade 24 paubos.
Gipasabot ni Alvarez nga ang pagpili sa mahimong GSIS scholar ipaagi sa nominasyon , mahimong pinaagi sa mga ginikanan mismo o kaha sa higala, paryente, o silingan sa usa ka ginikanang miyembro sa GSIS
Matud pa ni Alvarez nga dinhi sa Visayas Region may 10 ka GSIS scholar nga gigahin alang sa mga anak sa mga miyembro nga motungha na sa unang ang-ang sa kolehiyo karong Hunyo.
Kini gikan sa 200 ka scholar nga ihatag sa GSIS sa tibuok nasud karong tuiga. Hinuon matud pa ni Alvarez nga ang maong programa magpadayon matag tuig.
Ang pagpili sa 10 ka scholar himoon pinaagi sa higpit nga screening sa mga rekord sa ginikanang miyembro sa GSIS sa mga anak nga inominar, dayon hagpaton kini pinaagi sa electronic raffle.
Midugang si Alvarez nga ang kwalipikadong ika-nominar alang sa GSIS scholarship mao kadtong may grado nga 85 per cent sa iyang paggraduwar sa high school. - BANAT NEWS