CEBU, Philippines - Charcoal briquettes na ug dili ordinaryong uling ang ipagamit sa pagluto sa mga barbecue nga karne sa Eco Larsian Bar BQ inigbukas niini karong unang semana sa Hunyo.
Si Engr. Adolfo Quiroga, Chief Provincial Planning and Development Office and Officer in Charge Provincial Engineering’s Office maoy gitahasan ni Governor Gwendolyn Garcia sa higpit nga pagpatuman niining maong matang sa sugnod sa gipatahom nga Eco Larsian Bar BQ sa Fuente Osmeña ning dakbayan sa Sugbo.
Nakombinse ang gobernador sa gipasalig ni Astrophel Ybañez, presidente sa Tabogon Ecological Management Association , Inc. nga ang charcoal briquettes walay aso ug anuhos lahi sa uling sa kahoy.
Namatud-an sa daghang pagtuon nga ang anuhos sa uling sa kahoy motapot sa karne nga isugba niini.
Sa higayong makaon sa tawo ang karne nga naputos sa anuhos siguradong makamugna kini og sakit nga kanser sa lawas sa tawo.
Busa aron masalbar ang mga tawong kusog kaayo mokaon og barbecue nga karne, gusto sa gobernador nga pangunahan sa Eco Larsian Bar BQ ang maong gimbuhaton aron dili sila mabasol sa tawo kun unsay mahitabo sa lawas niini ilabi na kun hingaon og barbecue nga karne. - BANAT NEWS