CEBU, Philippines - Gumikan sa pangomedya dala ang bugal-bugal, naangol ang usa ka tawo nga gidunggab sa iyang silingan sa dalan Dela Serna sa barangay Poblacion sa dakbayan sa Lapulapu sa miaging kaadlawon.
Ang biktima mao si Paul Alonso, 24 , samtang ang suspetsado mao si Nino Alcoseba, hingkod, nga pulos nagpuyo sa maong dapit.
Si SPO1 Allan Pantaloon sa homicide section sa kapolisan sa maong dakbayan nga nahinabi sa Banat News miingon naglakaw ang suspetsado ug ang kapuyo niini sa karsada dihang gikomedyahan dala ang pagbugal-bugal sa biktima ang iyang(suspek) kapuyo.
Gumikan sa iyang kapungot , pag-abot niya sa ilang balay mikuha kini og kutsilyo ug gibalik niya ang nahimutangan sa biktima dayon giluba.
Nasabak sa tiyan ug bukton ang biktima ug nalandig kini sa Lapulapu City Hospital apan gibalhin kini ngadto sa Vicente Sotto Memorial Medical Center sa dakbayan sa Sugbo.
Samtang ang suspetsado gipangita pa karon sa kapolisan human kini makasibat. (/WC) - BANAT NEWS