CEBU, Philippines - Tungod kay ang syudad sa Sugbo maoy dunay labing daghan og kaso sa dengue, ang Department of Education (Dep-Ed) 7 molusad sa programang gitawag Dengue Prevention and Awareness Program matag tuig.
Matud pa ni Danilo Gudelosao, Education Program Supervisor Dep-Ed Cebu City Division nga nahinabi sa Banat News pinaagi sa telepono nga kining maong programa apil na sa ilang agenda ug nga nakig-alayon usab sila sa Department of Health (DOH) 7 aron mahatagan ang katawhan og igong impormasyon aron malikayan ang dengue. Dugang pa niya nga tungod kay hapit naman ang ting-uwan adunay posibilidad nga mokatap na usab kining maong sakit ilabi na sa mga bata nga maoy dali kaayong mataptan niini.
Ang Dep-Ed 7 adunay kaugalingong Health and Nutrition Unit sa matag tunghaan aron mag-monitor sa kahimtang sa panglawas sa mga bata ug motudlo sa mga preventive measures paglikay niini.
Gikatakdang magtagbo ang mga principal kalabot sa adbokasiya sa DepEd kontra dengue karong Hunyo 1.
Sa talaan sa Regional Epidemiology and Surveillance Unit, ang syudad sa Sugbo sa miaging tuig mitala kini og 698 ka kaso sa dengue diin pito niini ang namatay samtang karung tuiga misaka na kini ngadto sa 1, 208 ka kaso ug walo na ang namatay. Sunod sa listahan ang syudad sa Lapu-lapu nga dunay 123 ka kaso sa miaging tuig ug usa ang namatay apan karung tuiga misaka na kini ngadto sa 131 ug tulo ang nakalas.
Sunod ang Minglanilla nga gikan sa 65 ka mga kaso sa dengue sa miaging tuig misaka na kini ngadto na sa 118 ug usa ang namatay karong tuiga. Sunod ang Mandaue nga adunay 124 ka kaso sa miaging tuig, usa ang namatay karon 58 ka kaso ang natala.
(BANAT NEWS)