CEBU, Philippines - Gikatakdang mohatag og hinabang si Bise Presidente Jejomar Binay sa mga naapektohan sa sunog sa Barrio Luz.
Kini maoy gibutyag kagahapon ni Mayor Michael Rama kinsa miangkon nga ipaagi sa iyang buhatan ang pag-apod apod sa maong mga hinabang sanglit sila maoy may record sa mga nasunogan ug aron usab mapahimutang ang tukmang sistema sa pag-pang-apod- apod niini ngadto sa mga tawo.
Nagkanayon si Rama nga gihikay na nila ang pagkuha sa maong mga relief goods nga anaa karon sa mga container van.
Naglaum ang mayor nga aduna pa’y ubang personalidad sa gobyerno ang motabang sa mga nasunogan.
Matud pa niya nga kung daghan ang motabang, daghan usab ang mga tawo nga matabangan ilabi na nga kapin sa duha ka libo ka tawo ang naapektohan sa sunog sa nahisgutang barangay.
Gihikay na usab karon sa siyudad ang mga papeles aron ma-release na sa dili madugay ang mga housing material sa mga nasunogan. Mapasalamaton usab si Rama sa tanang institusyon o mga tawo nga mitabang sa nasunogan ug giklaro niya nga ning panahona angay nga ipadaplin una ang politika busa mas labing maayo nga daghan ang motabang.
Gawas kang Rama, nanghatag usab og hinabang sila si Kongresista Tomas Osmeña ug Kongresista Cutie del Mar ngadto sa mga nasunogan. BANAT NEWS