CEBU, Philippines - Lima ka tawo ang naangol nga naglakip sa usa ka konsehal sa barangay human sila pamusila sa nagkalainlaing dapit ning lalawigan sa miaging Domingo sa gabii.
Ang mga biktima mao sila si konsehal Dennis Patiluna, 35, minyo nga taga sitio Tabios, sa barangay Pawa, lungsod sa Dumanjug, Virgilio Manero, 37 , Virgilio Alamalam, 36, ug Ruerito Francisco, 38 , pulos minyo ug lumad nga taga Zamboanga City apan mga stay-in worker sa gitrabaho nilang bodega sa sitio Calderohan , barangay Maguikay, dakbayan sa Mandaue, ug Emerald Aton, 15, nga taga Calderohan usab
Si Patiluna kinsa konsehal sa barangay Pawa paingon nang mopauli sa ilang balay gikan sa piyesta sa kasikbit nilang barangay dihang gipusil ang walang bahin sa iyang nawong pinaagi sa iyang silingan nga si Carlito Asentista Jr., hamtong ug minyo.
Samtang si Manero, Alamalam, ug Franciso nag-inom sa gawas sa gipanday nilang bodega dihang kalit lang gipamusil sa wala hiilhing lalaki nga taason ang pamarog, may patik nga guardian ang kamot ug taas ug kulongon ang buhok. Ang unang biktima nga si Manero naigo sa walang dughan, natiil usab si Alamalam, ug dughan usab ang igo ni Francisco.
Samtang ang 15 anyos nga bayong-bayong igo lang nahiagi sa maong dapit dihang nasabak ang lawas niini sa saag nga bala gikan sa namusil sa tulo ka mga panday. Ang lima ka mga biktima pulos gidala ngadto sa Vicente Sotto Memorial Medical Center sa dakbayan sa Sugbo
Matud pa ni SPO1 Dexter Martin sa Mandaue City Police Office nga padayon pa nilang gipangita karon ang mipusil sa mga biktima.
Samtang ang miluthang kang Patiluna nagkagulkol na karon sa prisohan sa Dumanjug ug nagpaabot nalang sa tukmang kiha nga isang-at batok kaniya. ( WC) - BANAT NEWS