CEBU, Philippines - Kasong Murder ang gisang-at batok sa napulo ka suspetsado sa pagpusil patay ni Carl Vinson Apura, ang anak sa mayor sa siyudad sa Carcar.
Ang mga gitumbok nga responsable mao silang Jaybhoy Lauron, ang gunman; Jethro Lapiña; Jewish Lapiña,; Glenn Cinco; James Ali Catañares; Jay Casatañares; Zig Abarquez; Demosthenes Abarquez; Rizal Cayme ug Jetto.
Sa gipadalang impormasyon ni OIC-Talisay City Prosecutor Richard Abangan Sr. kini mibutyag nga adunay igong basihan nga mapasakaan og kasong murder ang mga nahisgutang akusado.
Dunay tulo ka testigong mitumbok sa mga akusado nga nagtakdo ang mga pamahayag bahin sa hitabo nga nag-ingong daw gibikil gyud og tuyo sa mga suspek ang biktima una pa ang aktwal nga pagpamusil.
Samtang personal nga nakigtagbo sa kapulisan sa siyudad sa Carcar ang hepe sa Cebu Police Provincial Office (CPPO) Sr.Supt. Patrocinio Comendador pagtubag sa hagit ni Carcar City Mayor Nicepuro Apura nga palawman pa ang imbestigasyon bahin sa maong kaso.
Si Comendador nakigkita ni Chief Insp. Teodulfo Manatad III uban sa chief investigator niini nga si SPO3 Jorame Tanudtanud ug mga kaubanan ug gituki ang maong kaso.
Si Apura dihang nahinabi sa Banat News atol sa unang adlaw pagbalik niya og duty kagahapon giangkon niining wala pa gyud sila hingpit maka-recover sa hitabo.
Subli niyang gihagit ang kapolisan nga palawman pa ang imbestigasyon tungod kay nagtuo gyud siya nga duna pay mas bug-at nga hinungdan sa krimen ug dili siya motuo sa pag-angkon sa usa sa mga suspek nga si Lauron nga gisuyaan siya sa anak sa mayor.
Gisalikway niyang konektado sa politika o sa negosyo ang krimen apan wala niya isalikway ang posibilidad nga frat related tungod kay sakop sa Akrho ang iyang anak ug ingon man ang kalambigitan sa ginadiling drugas gumikan kay usa siya sa nangusog sa kampanya batok niini. ( EIM) - BANAT NEWS