CEBU, Philippines - Mikabat sa 19 ka estudyante nga taga Cebu nangaangol human matagak sa 15 metros nga giladmon sa bung-aw ang school bus nga ilang gisakyan didto sa Kilometer 41, sa Barangay Igmaya-an, lungsod sa Don Salvador Benedicto, Negros Occidental alas 11:15 kagahapon sa buntag.
Si PO3 Edgar Corteza, traffic investigator sa Don Salvador Benedicto Police Station mibutyag nga walay nangamatay sa maong aksidente apan may mga biktima nga anaa sa talandugon nga kahimtang.
Ang mga biktima mao sila si John Michael Torrefel, 16; Edna Balbuena, 26; Ralph Padilla, 20; Noel Malinao, 17; James Gallarde, 18; Judee Mahipos, 20; Jenette Solomon, 26; Lewbi Laborte, 18; Maria Teresa Pepino, 19; Chonafer Barbadillo, 21; Shalo Mel Tundag, 15; Jonnie Lamhon, 20; Hazel Yap, 18; Charlene Ann Engina, 15; Iris Barbadillo, 19; Phi Chanteuss Ilaga, 20; Kathline Pañares, 22; Eduardo Empeles, 20:; ug Niño Bautista, 20.
Ang tanan gikan pa sa Don Bosco Youth Center of Our Lady of Lourdes sa dakbayan sa Sugbo gihatud dayon ngadto sa nagkalain-laing tambalanan sa Murcia ug dakbayan sa Bacolod.
Sumala sa kapolisan nga ang mga molupyo sa Purok Talos, Barangay Igmaya-an nga nakasaksi sa maong hitabo mitabang usab sa mga biktima.
Matud ni Corteza nga ang gisakyan sa mga biktima usa sa duha ka school bus sa Don Bosco Technical Institute sa Victorias City, Negros Occidental nga misugat sa mga estudyante nga gikan sa Sugbo didto sa San Carlos City, Negros Occidental.
Sa oras sa pagsuwat niining balita kagahapon sa hapon si Corteza nagkanayon nga wala pa nila masuta ang hingpit nga gidaghanon sa mga estudyante nga nadisgrasya apan ang mga rescuer midala og walo ka biktima ngadto sa Bacolod Adventist Church (Sanitarium) ug laing 11 ngadto sa tambalanan sa Murcia ug Bacolod.
Ang mga estudyante giingong paingon untang mag-camping didto sa Mambukal Resort sa Bacolod.
Ang drayber sa bus nga si Francis Ledesma, 39, taga Canetown, Victorias City ang natanggong karon sa Don Salvador Benedicto Police Station diin tua siya imbistigaha.
Kahinumdoman nga niadtong Mayo sa milabay’ng tuig duha ka tawo ang namatay ug laing 10 ang naangol human ang Ceres Bus Liner nga ilang gisakyan nahagbong sa 60 metros nga giladmon nga bung-aw didto sa San Carlos City.
Ang maong lugar maoy agian paingon sa Don Salvador Benedicto. (BANAT NEWS)