CEBU, Philippines - Nagplano ang Cebu City Police Office (CCPO) nga mopahigayon og usa ka konsiyerto sa Hunyo 25, 2012 alang sa pamilya sa kapolisan nga naapil sa sunog nga miigo didto sa barangay Luz, ning dakbayan sa Sugbo sa miaging semana.
Ang maong konsiyerto tawgong “Police-Media Concert for a Cause” nga ipahigayon sulod sa CCPO Headquarters, sa Camp Sotero Cabahug, Gorordo Ave. barangay Camputhaw ning dakbayan.
Ang maong programa sa CCPO abagan usab sa mga sakop sa Defense PNP Press Corps (DEPP) grupo sa mga police beat nga mga reporter.
Si Sr. Supt. Melvin Ramon Buenafe, CCPO director, nagkanayon nga ang maong kalihokan gitumong aron ang kitaon niini, ikahinabang sa unom ka mga polis nga nawad-an og pinuy-anan gumikan sa maong sunog. Pipila kanila mao si SPO2 Jonas Paquibot sa Police Regional Office-7; SPO2 Ariel Coloscos sakop sa San Nicolas Police Station ug PO2 Philip Plasus sakop sa Guadalupe Police Station.
Sa miaging adlaw si Buenafe nakigtagbo sa duha ka apektadong polis ug iya silang gisaaran nga hatagan og mga construction material alang sa balay nga ilang ipatukod.
Si Chito Aragon, reporter sa Cebu Daily News ug DyLA ug presidente sa DEPP miingon nga andam siyang motabang sa mga pulis pinaagi niining maong proyekto.
Matud ni Aragon ang maong proyekto dili lang kay karon pa nila himoa.
Sa miaging duha ka tuig, nakapahigayon na ang DEPP og konsiyerto didto sa Police Regional Office (PRO) 7 Headquarters, diin ang kita gihinabang usab sa mga nawad-an og pinuy-anan nga mga polis nga naangin sa sunog nga miigo sa barangay T. Padilla.
Matud ni Aragon nga kun dako ang kitaon sa konsiyertong umaabot, dili lang kay mga polis ra ang katabangan kundili bisan pa ang ubang mga sibilyan nga nabiktima gihapon sa sunog.
Mikabat sa 570 ka pamilya gikan sa lima ka sitio nga nasunog kasamtangang gipahiluna diha sa Barangay Luz Elementary School . (BANATNEWS) )