CEBU, Philippines - Gipahimangnoan ang publiko nga angay magbantay sa pagluto og pagkaon aron dili makahilo sa mokaon niini.
Ang maong pasidaan gipalanog ni Regional Director Asuncion Arden sa Department of Health (DOH)7 kalabot sa pagkahilo sa 13 ka tawo nga nakakaon sa binangkal didto sa lungsod sa San Fernando sa miaging adlaw.
Matud pa ni Arden nga una magluto og pagkaon sutaon pag-ayo ang mga material nga gamiton, mga kasangkapan sa pagluto, ug bisan ang moluto aron masiguro nga limpyo ug luwas sa ikadaot sa lawas sa makakaon niini.
Samtang si Angelita Salarda, local health supervisor sa DOH-7 miingon nga ang resulta sa giiksamin nga sample sa binangkal nga gihatud sa ilang buhatan ug ilang gipalaboratoryo, masayran na sa sunod semana.
Ang mga biktima nga nakakaon sa binangkal nagagikan sa Barangay Freenhills, San Fernando nga mao sila si Zenna Jhedes Bernabe 2 anyos, Brian Kim Bernabe 22 anyos, Alyssa Kim Alipoyo 20 anyos, Lady Love dela Peña 9 anyos, Daryl Ganyas 11 anyos, Ian Genon 7 anyos, Andre Jafit Genon 9 anyos, Khenjee Alinsonoren 12 anyos, John Icey Genayas 12 anyos, Calnesim 9 anyos, Mancao 15 anyos, Blessvi Mae dela Cerna 13 anyos, ug Cristita Bernabe 69 anyos.
Si Cristia miingon nga siya ang miluto sa maong pagkaon niadtong Miyerkules tungod kay ang iyang mga higala nga sila si Jesi ug Lorna nag-order ug daghang binangkal gikan kaniya ug usab miingon siya nga ang ubang biktima iyang mga apo ug kaparyentehan kinsa miambit usab sa maong pagkaon. (BANATNEWS)