CEBU, Philippines - Usa ka bayong-bayong gisikop sa mga tanod sa barangay Lipayran lungsod sa Bantayan niadtong Miyerkules sa gabii human kini itumbok nga milugos sa 3 anyos nga batang babaye nga iyang silingan.
Gitanggong karon sa Bantayan Police stockade si Ranilo, 17, (tinuod nga ngalan gipugngan sa Banat News), usa ka out of school youth.
Si PO3 Jesus Aguisanda, sa Bantayan Police Station, miingon nga ang inahan sa biktima maoy misumbong ngadto sa ilang buhatan niadtong Huwebes sa buntag bahin sa nahitabo sa iyang anak. Matud pa sa inahan nga gitawag ang iyang anak sa suspek ug sa dihang miduol kini, gidala sa kasagbotan ug gipahimuslan.
Apan ang yawan-ong buhat sa suspek, nakit-an sa ila ra sab nga silingan ug maoy mitug-an sa inahan sa biktima.
Dihang mipauli na ang bata ngadto sa ilang balay, daling gipangutana sa inahan kun unsay nahitabo kaniya, apan ang bata giingong walay lipod-lipod nga mitug-an sa iyang inahan nga gipahimuslan siya sa suspek pinaagi sa pagpasok sa tudlo sa suspek ngadto sa kinatawo sa bata. Gani, sumala pa sa kapolisan nga mitug-an ang bata nga gihulga siya sa suspek nga putlan siya’g liog kun mosulti kini ngadto ni bisan kinsa bahin sa nahitabo.
Gikomprontasi sa inahan ang suspek apan midagan kini ug gani wala gayud kini hidakpi sa kapolisan nga nangita kaniya human sa hitabo.
Maayo nalang kay milihok ang mga tanod sa maong lugar ug maoy nakasikop sa suspetsado ug miturn-over niini ngadto sa kapolisan.
Ang biktima gipahiling sa pink room sa Vicente Sotto Memorial Medical Center (VSMMC) samtang ang suspek gipaabot nga pasakaan og tukmang kaso sa piskaliya. (BANATNEWS)