CEBU, Philippines - Gidunggab patay sa usa ka hubog ang iyang ugangan ug naangol ang iyang asawa ug ang 2-anyos nga pag-umangkon dihang nagkagubot ang pamilya sa bukirang bahin sa sitio Private, barangay Mantalongon lungsod sa Dalaguete alas 6:30 niadtong Lunes sa gabii.
Ang biktima nga patay dihadiha mao si Lucas Binarao, 48, samtang naangol usab ang asawa sa suspek nga si Maricel Binarao Plarisan, 28, ug ang 2-anyos pag-umangkon niini. Samtang padayon pang gipangita ang suspek nga si Rolando Plarisan, 33, bana ni Maricel kinsa daling miikyas.
Matud ni PO3 Christopher Requina sa Dalaguete Police dihang nahinabi sa Banat News dugay nang gibuwagan ni Maricel ang suspek tungod sa pagkahingulata niini, duna sila’y lima ka mga gagmay’ng anak. Sumala pa nga gikan namista ang suspek ug hubog nga milahos sa balay sa mga biktima ug namugos nga makig-uli kang Maricel apan nagdumili ang naulahi ug miresulta sa kagubot.
Tungatunga sa kaguliyang gidunggab sa suspek si Maricel sa liog ug bukobuko hinungdan nga mitabang ang amahan niining si Lucas apan gidunggab kini sa suspek sa tuong bahin sa ilokan, ang 2-anyos nga bata nga milaban sa iyaan nasamdan sad sa walang abaga.
Ang mga biktima gidala sa Cardinal Rosales Hospital apan patay na si Lucas. Nianang pagkaalas 10:30 sa gabii sa samang adlaw gibalikan sa suspek ang ilang balay ug gisunog kini. (BANAT NEWS)