CEBU, Philippines - Aron malikayan ang sunog, gisusi sa mga tinugyanan sa bombero ang mga publikong tulunghaan ug mga boarding house sa dakbayan sa Mandaue ug dakbayan sa Lapulapu
Si Supt. Oscar Mayol sa Bureau of Fire Protection (BFP) nga maoy city fire marshall sa dakbayan sa Lapulapu miingon nga kining maong inspection maoy iyang tubag sa mando gikan sa rehiyonal nilang buhatan.
Matud pa ni Mayol nga ilang sutaon ang tinuod nga kahimtang sa matag edipisyo lakip na ang mga fire exit niini.
Kini aron sa pagsiguro sa kinabuhi sa mga tinun-an sa mga tulunghaan ug sa mga nanagpuyo sa mga boarding house o balay paabangan.
Si Chief Inspector Rogelio Bongabong nga maoy fire marshall sa dakbayan sa Mandaue miingon nga gisugdan na usab nila ang pag-inspeksiyon sa mga tulunghaan ug boarding house sa dakbayan. Gitataw niya nga niadtong Biyernes niya madawat ang kamandoan gikan sa ilang headquater nga nagsugo nga ipa-inspection pagsiguro ang mga fire exit sa matag edipisyo sa eskuylahan ug mga balay paabangan sa dakbayan.
Gipasabot sila pag-ayo sa kamahinungdanon sa fire exit sanglit mao lamang kini ang bugtong makaluwas sa kinabuhi sa mga nag-ukopar sa mga nahisgutang edipisyo sa panahon sa sunog. - BANAT NEWS